MERDIKA!
Dari ini tjorong misih ada chabar perkara lindoe jang soeda bikin gojang tanah Djawa Barat, Hari Rebo laloe. Ini kadjadian djadi begitoe heibat, koetika angka demi angka koerban moentjoel satoe demi satoe. Sehingganja katimoe angka 68 riboe roemah di bilangan 12 kaboepaten di Djawa Barat, ada jang roesak berat dan ada jang roesak ringan.
Itoe rahajat jang ikoet djadi koerban lindoe dengen kekoeatan 7,3 SR/ ada sampe 72 orang hilang, di desa Tjikangkareng, Tjibinong Tjiandoer. Baroe doea poeloehan koerban jang dikatemoekan dalem keadaan mati memiloeken. Ada banjak bilangan opziren dan soldadoe misih sedeng oesaha evakoeasi di itoe lokatie. Sementaranja di Tasikmalaja ada djoega roemah-roemah jang roesak sehingga 70 persen di ampat ketjamatan dari 39 ketjamatan jang ada di itoe kaboepaten.
Nahamoen, misih ada ketrangan jang bisa bikin kita was-was, lantaran ada sangkoet paoet dengen kamoengkinan misih ada lagi lindoe atawa gempa boemi jang lebih heibat, dengen kekoeatan 8 SR lebih, jang bisa kadjadian dengen sekonjong-konjong, di sepoeter Djawa Barat dan Provintie Bantam. Belon lagi ketrangan perkara adanja wilajah Danaoe Toba jang doelonja sebuah goenoeng api, didoega misih poenja daja eroeptie jang sangat heibat sebage super voelkano, jang bisa sadja meletoep dalem itoengan ini abad.
Ini poela lantarannja, Provintie Djawa Barat dan Bantam atawa Banten perloe poenja tjara jang sistematis dan djitoe, jang ada kaitan dengen disaster management atawa manajemen tanggoelangan bentjana.
Tidak ada komentar:
Posting Komentar